این مقام تاجیکستان افزود با توجه به افزایش حجم قاچاق مواد مخدر از افغانستان به تاجیکستان، شمار قاچاقچیان مواد مخدر که در دو سال گذشته بازداشت شده‌اند نیز افزایش را نشان می‌دهد.
بر اساس اظهارات وی، در سال ۲۰۲۱، ۸ شهروند افغانستان به جرم قاچاق مواد مخدر در تاجیکستان دستگیر شدند و در سال ۲۰۲۲، ۱۹ نفر.
تاجیکستان می‌گوید بزرگترین محموله‌های مواد مخدر قاچاق شده به تاجیکستان از افغانستان است.
دادستان کل تاجیکستان نیز چندی پیش در کنفرانس همکاریهای بین‌المللی و منطقه‌ای برای مبارزه با تروریسم گفت که قاچاق مواد مخدر از افغانستان تقریبا دو برابر شده است. رحمان یوسف احمدزاد در این نشست که در پایتخت تاجیکستان برگزار شده بود، افزود: «قاچاق مواد مخدر حمایت مالی از تروریست‌ها است.»
مقام‌های تاجیکستان می‌گویند با افزایش قاچاق مواد مخدر از افغانستان، کشورهای منطقه باید همکاریهای خود را گسترش دهند.
آیدار شیگایف، رئیس اداره مبارزه با قاچاق مواد مخدر وزارت داخله قرقیزستان هم پیشتر اعلام کرده بود که مواد مخدر زیادی از افغانستان وارد بازار سیاه کشورهای منطقه شده است.
قاچاق مواد مخدر به تاجیکستان و کشورهای آسیای میانه در حالیست که طالبان در فرمانی کشت و خرید و فروش کوکنار در افغانستان را ممنوع کرده‌اند.
با این حال، گزارش‌های منتشر شده نشان می‌دهد که تولید و خرید و فروش آن همچنان ادامه دارد.
منبع: شفقنا
