رئیس جمهور تاجیکستان: وضعیت امروز افغانستان نتیجه مداخله خارجی است

به گزارش شهرآرانیوز؛ رئیس جمهور تاجیکستان که روز چهارشنبه، هفدهم سنبله- شهریور، به مناسبت سالگرد استقلال تاجیکستان صحبت می‌کرد، گفت که براساس تحلیل‌ها، وضعیت افغانستان در جریان ماه گذشته «پیچیده‌تر» و «فاجعه‌بارتر» شده است.

امام‌علی رحمان وضعیت کنونی افغانستان را بخشی از نگرانی جدی کشورهای منطقه و جهان عنوان کرد.

وی افزود: «یک بار دیگر یادآوری کنم که مردم افغانستان با تاریخ، تمدن و فرهنگ هزار ساله‌شان مقصر چنین وضعیت غم‌انگیزی نیستند. بی‌ثباتی و فاجعه‌ای که برای مردم این کشور باستانی رخ داد، نتیجه دخالت خارجی و اقدامات کشورهای ذی‌نفع در منطقه و جهان است که هنوز ادامه دارد.»

رییس جمهور تاجیکستان گفت که این کشور از تسریع صلح در افغانستان و تشکیل حکومت همه‌شمول که منافع همه مردم را در نظر بگیرد، حمایت می‌کند.

او از سکوت نهادهای حقوق بشری بین‌المللی ابراز تعجب کرده و گفته است که این نهادها هنوز هیچ ابتکار عملی را برای حقوق مردم افغانستان روی دست نگرفته‌اند.

به گفته رحمان، وضعیت افغانستان به گونه مستقیم روی وضعیت کشورهای آسیای میانه تأثیر دارد و امنیت در تاجیکستان به امنیت در افغانستان وابسته است.

رییس جمهور تاجیکستان گفت که مسأله افغانستان راه‌حل نظامی ندارد و تنها مذاکره می‌تواند راه‌گشا باشد؛ اما به باور امام‌علی رحمان، جامعه بین‌المللی به‌شمول کشورهای دخیل به موضوع افغانستان تاکنون بی‌تفاوتی نشان داده‌اند.

او خواستار اقدامات جمعی و عاجل کشورهای منطقه و جهان برای رسیدگی به مشکلات افغانستان شد و گفت که باید کمک‌های بشردوستانه به همه اقوام افغانستان تأمین شود.

گفتنی است که رییس جمهور تاجیکستان روز گذشته نیز در جریان یک رژه نظامی، به نظامیان کشورش توصیه کرده بود که وضعیت افغانستان بحرانی است و قوای مرزی در حالت آماده‌باش قرار گیرند.

منبع: ۸صبح