رئیس شورای عالی مصالحه ملی افغانستان با رئیس جمهور تاجیکستان دیدار و گفت‌وگو کرد.
به گزارش شهرآرانیوز؛ عبدالله عبدالله، رئیس شورای عالی مصالحه ملی افغانستان قبل از ظهر امروز (دوشنبه ۲ جدی/ دی ماه) با امام علی رحمان، رئیس جمهور تاجیکستان دیدار و درباره موضوعات مختلف گفت‌وگو کرد.
رئیس جمهور تاجیکستان در این دیدار ابراز امیدواری کرد که تلاش‌های صلح در افغانستان به پیروزی برسد.
رحمان، افغانستان را از دوستان و متحدان نزدیک تاجیکستان خواند و تاکید کرد که این روابط ریشه در همسایگی، مشترکات تاریخی، فرهنگی و دینی دارد. وی صلح و ثبات در افغانستان را ثبات در تاجیکستان، منطقه و فراتر از منطقه خواند.
رئیس جمهور تاجیکستان افزود که افغانستان، تاجیکستان و منطقه از دهشت‌افکنی، افراط‌گرایی و بی‌ثباتی متضرر شده‌اند و صلح و ثبات در افغانستان زمینه گسترش و توسعه تجارت و ترانزیت میان دو کشور، منطقه و اتصال آسیای مرکزی به جنوب آسیا را فراهم می‌سازد.
عبدالله عبدالله، رئیس شورای عالی مصالحه ملی افغانستان نیز در این دیدار تاکید کرد که جمهوری اسلامی افغانستان در مذاکرات صلح به دست یافتن به صلح پایدار، عادلانه، باعزت و با حفظ ارزش‌های جمهوریت متعهد می‌باشد.
رئیس شورای عالی مصالحه ملی افغانستان از افزایش خشونت و جنگ به عنوان یکی از نگرانی‌های حکومت و مردم افغانستان در این مرحله نام برد و بر ختم جنگ و قطع خونریزی در جریان مذاکرات تاکید نمود.
عبدالله عبدالله روز گذشته در راس یک هیات دولتی به تاجیکستان رفت و با برخی دیگر از مقامات این کشور نیز دیدار کرد.
دیدگاه های ارسال شده توسط شما، پس از تائید توسط شهرآرانیوز در سایت منتشر خواهد شد.
نظراتی که حاوی توهین و افترا باشد منتشر نخواهد شد.
